2016/2017 voleybol mövsümü üzrə Azərbaycan Super Liqasının qalibləri mükafatlandırılıb.

Mükafatlandırmaya əsasən, Nəqliyyat, Rabitə və Yüksək Texnologiyalar Nazirliyinin himayəsində olan “Telekom” qadın voleybol komandası qızıl medala layiq görülüb. “Azərreyl” gümüş, “Azəryol” komandası isə bürünc medal qazanıb.

Məlum olduğu kimi, 2016/2017 voleybol mövsümündə Azərbaycan Çempionatı çərçivəsində qadınlar arasında Super Liqa yarışları 27 mart 2017-ci il tarixində başa çatıb. “Telekom” qadın voleybol komandası Super Liqanın son turunda “Lokomotiv” komandası üzərində 3:0 hesabı ilə qalib gələrək çempion tituluna yiyələnib.

“Telekom” komandasının üzvlərinə qızıl medallar və çempionluq kuboku Azərbaycan Voleybol Federasiyasının və Gənclər və İdman Nazirliyinin rəsmiləri tərəfindən təqdim edilib.

Bundan başqa, “Telekom”un oyunçularından Yelizaveta Səmədova 2016/2017 Azərbaycan Çempionatının “ən dəyərli voleybolçu” tituluna, Olena Həsənova isə “ən yaxşı blokçu” tituluna layiq görülüblər.

Eyni zamanda, komandamızın yerli yetirmələri Yelizaveta Səmədova, Ülkər Kərimova, Olena Həsənova, Yana Əzimova, Marqarita Əzizova, Anastassia Baidiuk, Anastasiya Bezsonova və Kristina Yaqubova Azərbaycan Voleybol Federasiyası tərəfindən Dünya Çempionatının Təsnifat Turniri və Avropa Çempionatının Final mərhələsinə hazırlıq məqsədilə qadınlardan ibarət Milli yığma komandaya dəvət olunublar.